Delhi-ah petrol pump 400 khar

Delhi khawpuia petrol pump 400 chu Delhi sorkarin petrol leh diesel-a Value Added Tax (VAT) a lak a tihhniam duh loh vangin nimin zing dar 6 aṭang khan darkar 23 chhung atan khar vek an ni.

Delhi Petrol Dealer's Association chuan ramchhung fuel man a to chhoh zel avangin sorkar laipui ngen angin state ṭhenkhat chuan an state-a VAT an lakte an tihniam a, mahse Delhi sorkar chuan hei hi a zawm ve duh loh vangin lungawi lohna lantir nan pump hi an khar tih an sawi. Uttar Pradesh leh Haryana-te chuan VAT an tihhniam avangin mi tam takin heng hmunah hian an lei a, Delhi khawpui chhunga oil hralhchhuah pawh October 15 thleng khan petrol chu 20% leh diesel chu 30% in a tlahniam tih a sawi.

Delhi sorkar leh petrol pump neitute hi VAT tihhniam chungchangah inbe mah se inremna an la siam theih loh vangin Delhi Petrol Dealers Association darkar 23 chhung atana pump khar an rel chu an kaltlangpui ta a ni.

Hetihlai hian Delhi Chief Minister Arvind Kejriwal-a chuan Delhi Petrol Dealers Association ten nawrh an huaihawt chungchangah politics a inrawlh ngei niin a sawi a, BJP sponsor-a nawrh hi huaihawt a nih thu petrol pum neitute chuan an hrilh niin a sawi. Politics tenawm tak an khelh chuan mipuite a hneh tawh lo a, inthlan awm hunah an phu tawk chhanna chu mipuiten an pe tawh dawn a ni, a ti.

Fuel man a to zel avangin sorkar laipui ngenna angin BJP sorkarna state - Uttar Pradesh, Madhya Pradesh, Gujarat, Maharashtra, Chhattisgarh, Assam, Uttarakhand, Himachal Pradesh leh Tripura te chuan an state-ah tuilahthei man hi an tihniam a ni. Mahse Kejriwal-a chuan PM Modi-a kaihhruai sorkarin fuel-a chhiah a lak chu Rs 10-a a tihpun laiin, fuel man chu Rs 2.50 chauhin a tihhniam a, hei hi thil zahthlak tak a nih thu sawiin, Rs 10 talin a man hi a tihniam tur a ni, tiin a sawi.