Bishop laka complaint thehluttu thia hmuh a ni

Nun pakhat pawngsualtua puh, bishop Franko Mulakkal laka complaint thehluttu, Jalandhar diocese-a puithiam Father Kuriakose Kattuthara chu nimin zing khan thia hmuh a ni a, a chhungten police-ah complaint an thehlut nghal.

Father Kattuthara chhungte chuan nimin zing kha Father hi kar kalta Zirtawpni zan khan a thi tih hrilh an nih thu a sawi. A chanchin hrilh an nih mai loh danah thil rinhlelhawm a awm nia an ngaih thu sawiin, thah a nih ngei an ring tih an sawi.

Hetihlai hian Jalandhar diocese-a Father Peter chuan Father Kattuthara hi zing dar 10 thleng pawha a thawhchhuah loh avangin sister-te chuan a room-ah an va kal a, kawngka tichhiain nikhaw hreloa a awm an hmu a, damdawi-in panpui ni mah se an thlen hmain a thi hman niin a sawi. A thih danah thil dik lo a awm lo niin a sawi.

Father Kuriakose Kattuthara hian Bishop Franko Mulakkal-an a pawngsual nia sawitu, Missionaries of Jesus nun chu a thlawp thu a lo sawi tawh a, hei vang hian interview a neihah a nunna atana a hlauhthawn thu a lo sawilang tawh a ni. Nun a thlawp vang hian kohhran hotu lam pawhin an vau niin a sawi bawk.

Nun pakhat chuan Roman Catholic bishop Mulakkal hian kum 2014 leh 2016 inkar khan a pawngsual fo niin a sawi a, hei vang hian September 21 khan man a ni. Mahse kar hmasa khan Kerala High Court chaun bishop Mulakkal hi bail-in a chhuahtir a ni.