Bihar-in zu khapna dan bawhchhiate dap nan helicopter hmang

Bihar sorkar chuan state chhunga zu siam leh zawrh khapna dan siam zawm lote dapna atan helicopter a hmang. Nitish Kumar kaihhruai Bihar sorkar hian kum 2016, April 6 aṭang khan state chhunga zu siam leh zawrh hi a lo khap tawh a ni.

State sorkar chuan a hma pawhin zu khapna dan bawhchhite dapna atan hian drone-te pawh a lo hmang tawh a ni.

Dan loa zu zuarte man an nih theihna atan hian Bihar sorkar chuan nimin aṭang khan helicopter a hmang ṭan a ni. Department of Prohibition and Excise-a official-te chu chopper-ah chuangin, Patna leh a chhehvelte an endik a ni. Chief minister Nitish Kumar chuan Thawhlehni khan Patna airport-ah helicopter-te hi a enfiah tawh bawk a, department-a officer te chuan dan bawhchhiate dap leh manna atana hman a nih dan turte an hrilhfiah.