Mumbai underworld kaihhnawihah ED-in Maha minister thu zawtfiah

Maharashtra-a Shvi Sena kaihhruai Maha Vikas Aghadi sorkar leh sorkar laipui ṭawngkama an inbeih mek karah, Maharashtra state minister Nawab Malik chu nimin zing khan Enforcement Directorate (ED) office-ah thu zawhfiah a ni.

Central probe agency hi nimin zing dar 6 khan Nawab Malik-a chennaah kalin, darkar khat vel an thu an zawt a ni. Hemi hnu hian ED office-ah hruaiin, darkar khat vel thu an zawtfiah leh bawk.

Maha ṭangrual sorkara tel, National Congress Party minister Malik hi Mumbai underworld, gangster Dawood Ibrahim leh a thurualpuite nena inzawmna neite sum neih dan kaihhnawih thilah thu zawhfiah a nih thu official chuan a sawi.

NCP founder president Sharad Pawar chuan he thil hi a thlen an ring lawk tih a sawi. "Nawab Malik hian BJP leh centre sorkar dik lohnate huai takin a sawichhuah avangin an rawn bitum kan lo ring lawk reng a ni," a ti.

Shiv Sena MP Sanjay Raout pawhin central agency-te chu dik lo taka hman an ni leh tih sawiin, Nawab Malik chuan thu dik a sawichhuak a, BJP chuan anmahni sawiseltute chu CBI leh ED a umzui tir nghal zel a ni, tiin a sawi.

Kar hnih liam ta khan Malik hian sorkar laipui chu Maharashtra sorkar paihthlak tumah a puh a, mahse NCP, Congress leh Shiv Sena-te chuan Maharashtra chauh ni lo, central-ah pawh BJP paihthlain thuneihna an chan tur thu a sawi. Malik hian central enforcement agency-te pawh BJP kaihhruai sorkar laipuiin a thunun, an duh dan anga eptu lam hruaitute bitum foah a lo puh tawh bawk.