Maharashtra Minister Nawab Malik man a ni ; Maha sorkarin ban an tum loh thu a sawi zui

Maharashtra minister Nawab Malik chu Enforcement Directorate (ED)-in firfiak tlanchhe mek Dawood Ibrahim nen pawisa inthawn tawn nia puha thu a zawhfiah hnuah Nilaini khan an man a, March 3 thleng an kawl ang.

ED hian darkar riat chuang zet thu an zawhfiah hnuah Malik hi special court-ah an hruai a ni. Court-ah hian Malik chuan tihluihna hmanga hruai a nih thu sawiin, a hmain an kohna hi pek a ni phawt tur a ni a, mahse engmah sawi lawk loin in aṭangin ED team hian an hruaichhuak niin a sawi. An puhna chungchangah hian a tlawm mai dawn lo tih sawiin, ""A tawp thlengin kan bei dawn a kan chak bawk ang, thil dik tak kan pholang ang," a ti.

Hetih lai hian ED chuan Malik hi firfiak Dawood leh a thurualpuite nen sum an inthawn leh, ram leina tur inremna an siam chungchangah thu zawhfiah a ni tih an sawi a, mahse Malik hian a thawhpui ṭha lo hle tih an sawi a ni.

Maharashtra minister Chhagan Bhujbal chuan Nawab Malik hi man ni mah se minister a nihna aṭangin ban a ni dawn lo tih a sawi. "Kum 30 liam ta chhung khan tumahin Nawab hming hi Mumbai bomb puak inkaihhnawihah an la sawi ri ngai lo. BJP kaihhruai sorkar laipui a sawisel avangin man a ni zawk a ni," a ti. Malik hi thla li chhunga central agency-in Maharashtra minister an man pahnihna a ni. Nikum November thla khan ED hian state home minister hlui Anil Deshmukh chuan an lo man tawh bawk.

NCP hruaitu, minister Malik man a nih avangin nimin khan Maharashtra-a Maha Vikas Aghadi ṭangrual sorkara minister leh MLA-te chuan lungawi lohna an lantir. Minister rualte hian south Mumbai-a state secretariat-ah lungawi lohna hi lantirin, vawiin aṭangin ṭangrual sorkara tel, party pathum - National Congress Party, Shiv Sena leh Congress party worker-te chuan state pumah lungawi lohna hi an lantir ve leh dawn bawk.