Rajasthan sorkarin MLA-te iPhone 13 a sem ; BJP MLA te'n an pe kir leh

Rajasthan-a Congress sorkar chuan state MLA-te chu iPhone 13 a sem a, mahse BJP MLA-te chuan an state-in sum lama harsatna an tawh mek thlirin state sorkarin thilpek a pek hi pek kir leh an tum.

Chief minister Ashok Gehlot kaihhruai sorkar chuan state budget pharh hnuah, Nilaini khan MLA 200-te chu iPhone 13 hi a pe vek a, pakhat hi Rs 70,000 chuang man a ni. Nikum khan CM Gehlot-a'n state budget a pharh hnuah MLA-te hi Ipad a lo pe vek tawh bawk.

BJP MLA-te chuan an state-in sum lama indaih lohna an tawh mek avangin, iPhone an dawn chu state sorkar hnenah an pe kir leh vek dawn tih an sawi. Rajasthan BJP chief Satish Poonia chuan an party hruaitu, Gulab Kataria, Rajendra leh MLA dangte nena an sawiho hnuah, BJP MLA-te chu an iPhone dawn pek kir leh vek hi an rel tih a sawi. Gulab Kataria pawhin, "Kan zavaiin phone kan nei a, entawn tur ṭha lo a thlen kan duh lo a ni. BJP MLA zawng zawngte chuan an phone dawn hi an pe let leh vek ang. Midangte pawh kan sawipui ang," a ti.

Bag emaw, briefcase emaw hmanga Budget pharh ṭhin chungchang pawh sawiin, Poonia chuan hei hi ṭul a tih loh thu leh, budget chu beauty parlour-a kalpui hnua makeup ṭha tak nena phochhuah angah a tehkhin. Budget pharh hnuah MLA te hi briefcase chhungah budget copy hi pek ṭhin an ni a, tun ṭumah erawh leather briefcase, a chhunga iPhone 13 leh budget copy awm chu pek tel an ni.

Member 200 awmna, Rajasthan Legislative Assembly-ah hian BJP hian MLA 71 a nei mek a ni.