Ukraine-a India mi awmte hruai haw tura hma la chak tawk lohah sorkar laipui puh

Congress party chuan prime minister Narendra Modi kaihhruai sorkar laipui chu hun khirh a thlenin hawisan ṭhinah a puh a, Ukraine-a India mi 20,000 awmte him taka hruai haw an nih theihna tura hma la chak tawk lohah a puh.

Russia leh Ukraine inkar boruak ṭha lo tak thlen mek laiin Ukraine-a India mi awmte chu hlauthawng takin an awm a, boruak chhe zawk a thlen hmaa him taka hruai haw theih a nih laiin, prime minister Modi chuan heng mite himna lam aiin inthlan chungchang ringawt a buaipui zawk a ni, tiin Congress chief spokesperson Randeep Surjewala chuan a sawi.

"Hun harsa a thlen apianga hawisan a, ngawi renga lo thlir hi PM Modi-a kaihhruai sorkar tihdan phung a ni ta a ni. Ukraine-a kan Indian pui 20,000 vel awmte chu dinhmun hlauhawm takah, hlauthawng reng reng a an awm a ngai ta a ni," a ti. Heng mite him taka hruai haw an nih theihna tura ruahmanna siam a nih loh chhan a zawt nghal bawk.

Hun eng emaw chen Ukraine leh Russia-te hi an inep hnuah, nimin zing khan Russia chuan Ukraine ram hi a run ṭan a, Ukraine chuan a airspace-te a khar nghal bawk. Ukraine-a Indian embassy chuan India mi awmte chu pawn chhuak lo tura chahin, Ukraine khawpui Kyiv-a zinte chu an awmna khawpui lamah, a bikin hmun him lam nia ngaih Ukraine khawthlang lam ramri bul lamahte awm rih turin a ti a ni.