SC-in green firecracker chauh hralhchhuah remti

Supreme Court chuan hal-puah/halmawi hralhchhuah kawngah khuahkhirhna siam-in, green firecracker (boruak tibawlhhlawh tlem leh eco-friendly) chauh zawrh chhuah a remti.

Nimina thupek a tihchhuah-ah, Court chuan thawm beng-chheng siam nasa lo, decimel sound limit in a huam chin green firecracker chauh chu zawrhchhuaha hal phal a ni, a ti. Judge Ajran Kumar Sikri chuan sumdawng licence neite chu halmawi him chin chauh an zawrh a phalsak a, online-a zawrh a khapsak bawk.

Court hian halmawi hralh chhuah khap tura ngenna, petition eng emaw zat lut a ngaihtuah hnuah he thutlukna hi a siam a ni.

SC chuan halpuah/halmawi hal theih hun chhung pawh a bithliah nghal bawk. Diwali leh sakhaw festival dangah chuan zan dar dar 8 - 10 inkarah hal phal a ni dawn a, Krismas leh Kum thar-ah chuan zan dar 11.45 leh zing dar 12.45 inkarah hal phal a ni thung ang.

Sorkar laipui leh state sorkar te chu hetiang hun pawimawha halpual/halmawi halna hmun bik siam dan ngaihtuah turin court chuan a ti bawk.

Nikum October 9 khan SC chuan Diwali hmaa halpuah/halmawi hralhchhuah a lo khap lailawk tawh a, mahse a hnuah sumdawngte ngenna avangin khapna hi a thlahdul leh ta a ni.