Mamata Banerjee-i in-a venhimna tichhah dawn

West Bengal Chief Minister Mamata Baner-jee-i venhimna pek chu tihchhah tum a ni a, state sorkar chuan Harish Chatterjee Street, Kolkata-a CM official residence-ah watchtower pahnih dah belh a tum.

Heng tower pahnih siamna atan hian cheng nuai 74 ruahman a ni a, ni 90 chhung siam zawh hman tura tih a ni.

Hetihlai hian state police-te chuan he report hi a dik lo nia sawiin, watchtower sak belh a ni lo tih an sawi thung, thu dik lo thehdarh a ni, an ti. Mahse Zee News chuan watchtower siamna tura West Bengal sorkar-a Public Works Department-in tender a tihchhuahna document a nei thung a ni.

Kumin kumtira TV-a an kawmnaah, Mamata hian political party ṭhenkhatin thah an tum thu a sawi a ni. "Party pakhat chuan mi that turin contract an pe a, min thah tumtute hian ka in pawh an enfiah vek a ni. Hei vang hian police-te chuan ka chenna chu sawn turin min ti a, hemi hma pawh hian min thah tum an awm tawh bawk a ni" tiin Mamata Banerjee chuan a sawi.

Banerjee-i chuan a thu dawn chu a rintlak tawk tih sawiin, Intelligence Bureau official ṭhenkhat pawhin sorkar bungalow-a insawn tura an ngen thu a sawi. Mamata Banerjee-i hi state chief minister a nih hmaa a chenna ṭhinah a la cheng chhunzawm reng a ni.