J&K school leh college-ah Ramayana, Bhagavad Gita dah dawn

Sakhaw dangte ngaihthah an ni: Omar Abdullah Jammu and Kashmir sorkar chuan tunhnaiah thupek tichhuakin, state chhunga school, college leh library-ahte Ramayana leh Bhagavad Gita Urdu version copy dah vek turin a ti a, hei hian sawizui a hlawh hle.

National Conference lea-der leh chief minister hlui Omar Abdullah chuan sorkar thuchhuah dan hi zawt letin, sakhaw lehkhabua thlan bik a neih chhan a zawt. Abdullah chuan a twitter-ah J&K sorkar chuan Hindu sakhua ni lo, sakhaw dangte chu a ngaihthah a ni, a ti.

"Engvangin nge Gita leh Ramayana chauh in thlan? School, college leh sorkar library hrang hrangah sakhaw lehkhabu dah vek tura tih a nih chuan, engvangin thlan bik a awm? Sakhaw dangte hi engtinge ngaihthah an nih?" tiin sorkar chu a zawt let a ni.

Hetihlai hian state sorkar chuan he thutlukna hi October 22-a Governor Satya Pal Malik-a advisor hoa meeting neihnaah siam a nih thu a sawi. Hemi hnu hian thupek hi tichhuakin, School Education Department, Higher Education Department, Director Colleges, Director, Libraries and Culture Department te chu "Shrimad Bhagwat-Geeta" leh "Koshur Ramayana" urdu version copy ṭhahnem tham tak zirna in leh library hrang hranga dah tur ngaihtuah turin a ti a ni.