India siam venhimna hmanrua ram 75 chuangah thawnchhuak tawh : PM Modi

Prime minister Narendra Modi chuan nimina Defence Ministry-in post-budget webinar a buatsaiha thu a sawiah, India rama siam venhimna hmanruate chu ram 75 chuangah thawnchhuah a ni tawh a ni, a ti.

PM Modi chuan Cyber security chu digital khawvel mai ni loin ram venhimna pawimawh tak anih theih tawh thu a sawi bawk. Ram dang aṭanga venhimna ralthuam lak luh chuan hun rei tak a duh ṭhin avangin ralthuam tam zawk chu a hmanlai hman ṭhin a, hei vang hian ramchhunga siamchhuah mai chu a finthlak tih a sawi. "Sal hun lai leh zalenna kan chan tirh aṭang khan kan ralthuam hian nasa takin hma a sawn tawh a ni. India-in ralthuam a siamchhuahte hi Indopui pahnihna hunlai khan an hmang nasa hle a ni," tiin a sawi.

"Tunhnai chho hian kan ralthuam chakna chuan tlakhniam lam pan mah se, India-ah ralthuam indaih lohna chu tun thleng pawh hian a la awm lo a ni," tiin kumina defence budget aṭanga 70% hi chu ramchhunga industry te tan dah hran an ni, a ti.

"IT lama kan chakna hi India chakna hnar a ni. Kan chaknate defence sector lama kan hman zel chuan kan ram venhim kawngah inrintawkna nasa zawk kan neih theih phah dawn a ni," a ti.

Modi chuan tun kum nga aṭanga kum ruk inkar liamta chhung khan India-in defence hmanrua a thawn chhuah a let ruk zeta a pung chu lawmawma tih thu a sawi bawk.