Ukraine-a India mi tangkhangte hruaichhuah dan ngaihtuah

Russia ramin a run mek, Ukraine ramah India mi eng emaw zat an tangkhang mek a, heng mite hi Ukraine ram ṭhenawm aṭangin hruaichhuah dan ngaihtuah a ni dawn tih sorkar lam thuchhuak chuan a tarlang.

Sorkar laipui chuan Ukraine-a India mite hruai hawna tur thlawhtheihna tirh dan tur hi a ruahman a, a senso zawng zawng pawh sorkar hian a tum vek ang.

Ningania Russia-in Ukraine a beih hnu khan, Ukraine chuan a airspace-te a khar nghal a ni. Hei vang hian hemi nia Ukraine khawpui,Kyiv pana thlawk Air India flight pawh ṭum thei loin Delhi lamah a rawn kir leh a ni.

Ukraine airspace khar a nih tak avangin sorkar chuan a ram ṭhenawm, Hungary leh Poland aṭanga India mi tangkhang mekte hruaichhuah dan tur hi ngaihtuahin team a tir a ni. Kyiv-a tangkhang mekte pawhin motor hmanga heng ram an pan dan tur kawng pawh ruahman a ni tawh tih foreign secretary Harsh Vardhan Shringla chuan a sawi.

Sorkar chuan India mi tangkhang mekte chu him taka hruaichhuah an nih vek theihna turin a theihtawp a chhuah dawn tih a sawi. Ukraine ramah hian India mi 16,000 vel an tangkhang mek nia sawi a ni.