India ramah Covid-19 kai thar 13,166 awm belh leh

India ramah Ningani khan coronavirus kai thar mi 13,166 awm belh lehin, Covid-19 kai hmuh chhuah tawh zat chu 4,28,94,345 niin, hri kai mek erawh 1,34,235 in an tlahniam thung.

Union Health Ministry-in nimin zinga data a tichhuahah, Ningani khan hripui vanga thi 302 awm belh lehin, Covid-19 thihpui hi mi 5,13,226 an tling tawh a ni.

Covid-19 hri kai thar chu ni 19 chhung mi nuai khat hnuai lamah a awm tawh. Hri kai mek, active case chu hri kai hmuh chhuah tawh aṭanga chhutin 0.31% a ni. Hri kai enkawl dam, Covid-19 recovery rate chu 98.49% a nih thu ministry chuan a tarlang bawk.

Nitina hri kai thar zat, daily positivity rate chu 1.28% ni mekin, kartina hri kai thar zat, weekly positivity rate hi 1.48% ah a tlahniam tawh.

Delhi-a khuahkhirhna siamte April 1-ah hlip vek dawn
Delhi Disaster Management Authority (DDMA) chuanCovid-19 hri leng vanga Delhi khawpuia khuahkhirhna hrang hrang siamte chu April 1-a hlih vek tawh a rel. Hei hian zan lama curfew puan leh restaurant leh bar-a 50% capacity chin bithliah siam pawh a huam tel vek dawn a ni.

Ningani khan Delhi-ah hian hri kai thar 556 leh thihpui paruk an awm. Delhi khawpuia hri kai hmuhchhuah thar, positivity rate hi 1.10% a ni tawh.

DDMA chuan pawn chhuahna face mask vuah lote sum chawi tir pawh Rs 1,000 aṭangin Rs 500-ah tihhniam a remti bawk.

Chief minister Arvind Kejriwal chuan khuahkhirhnate thlahdul chhoh zel ni mah se, mipuite chu Covid-19 laka invenna tur kaihhruaina siamte chu ṭha taka zawm turin a chah.

State/UT-te khuahkhirhna thlahdul dan ngaihtuah turin ­ti
Union home ministry chuan nimin khan state leh union territory-te chu ram chhunga hri lengin ziaawm lam a pan zel avangin, Covid hri leng vanga social, sports, enterntainment, academic leh religious event lam leh, zan lama curfew an siamte chu thlahdul dan ngaihtuah tawh turin a ti.

March thla atana Covid-19 guidelines siam tichhuakin, union home secretary Ajay Bhalla chuan union health ministry rawtna anga economic activity-te hawn chu a hun tawh tih a sawi bawk. He guidelines thar hi state leh UT tina chief secretary-te thawn an ni.

Khuahkhirhnate thlahdul chho tura ngenna siam a nih rualin, Home Secretary chuan face mask vuah, social distancing dan zawm, kut silfai ṭhatte chu ṭha taka kenkawh chhunzawm zel a la ṭul thu a sawi nghal bawk.