CBI hotu lu pahnih chawlh tir Interim head atan Nageshwar Rao ruat

Central Bureau of Investi-gation (CBI) agency Director Alok Verma leh Special Director Rakesh Asthana te chu nimin khan leave laktir an ni a, agency interim head atan Joint Director ni lai M Nageshwar Rao chu ruat nghal a ni.

CBI Director leh Special Director inkar boruak hi a ṭha lo hle a, thamna sum laah an inpuh tawn a ni.

CBI hian an special Director Rakesh Asthana chu sumdawng lian hnen aṭanga thamna, cheng vaibelchhe 3 laah puhin a lakah thubuai a lo ziaklut tawh a ni. Mahse Asthana hian an puhna hi phain, sorkar hnenah a boss, Alok Vermnazawk chuan sumdawng an sawi hnen aṭang hian thamna cheng vaibelchhe 2 a la niin a sawi thung a, Alok Verma leh a team te laka a complaint, phek 50 zeta chhah a thehlut a ni. Asthana hian CBI court-ah a laka thubuai ziahlut chu sut leh tur pawhin a lo ngen tawh bawk.

Agency hotu lu pahnihte inkara buaina awm vanga Chief Vigilance Commissioner KV Chowdary rawtna angin, an mawhphurhna te hlihsak rih an ni ta a ni. Prime Minister Narendra Modi pawhin Alok Verma lah Rakesh Asthana-te hian inkar buaina chungchang hi a sawipui tawh bawk.

Sorkar laipui chuan CBI hotu lian pahnih chawlhtir an nih chungchang hi sawhfiahin, an chungchang chhui hna dik taka kalpui a nih theihna atan leh, agency zahawmna vawnhimna tura tih a nih thu a sawi. Union Minister Arun Jaitley-a chuan CBI director leh a deputy hi thil dik tawk loa tia puhna a awm ve ve avangin chhui chian an ngai tih a sawi. An chungchang chhui zawh a nih hnuah, an puhna lakah hian an fihlim tih hriat a nih chuan an hna hi an zawm leh nghal dawn tih a sawi.

CBI Director leh Special Director-te chawlh lak tir an nih hnu hian a office pawh khar nghal a ni a, pawn lam mite bakah staff-te ngei pawh an luh phalsak a ni lo.

Thawhlehni zan tlai tawh takah khan Prime Minister kaihhruai Appointments Committee of the Cabinet chuan CBI interim head atana M Nageshwar Rao ruatna thupek hi a tichhuak a ni. CBI director thar Rao hi 1986 batch officer, Odisha cadre a ni.

Agency hotu thar, Rao chuan thamna laa Asthana puhna chungchang chhuitu tur team thar a din nghal a, he team hotu atan hian Satish Dagar ruat a ni. Satish Dagar hi Dera Sachcha Saudha hotu Gurmet Ram Rahim chungchang lo chhui tawhtu a ni.

Alok Verma chuan sorkarin a hna aṭanga chawlh a laktir hi court-ah a khing let nghal a, a petition thehluh hi Zirtawpni hian Supreme Court chuan a ngaihtuah ang.