Operation Ganga hmangin Ukraine-a India mi awmte hruai haw mek

Russia-in Ukraine a run avangin Ukraine rama India mi awmte chu Operation Ganga tih hmangin hruai haw hna kalpui mek a ni.

Nimin khan Ukraine aṭanga Romania-a lut, India mi 250-te chu Bucharest airport aṭangin Air India (AI) 192 special flight hmangin hruai haw leh an ni a, union civil aviation minister Jyotiraditya Scindia chuan pangpar nen Delhi airport-ah a lo dawngsawng a ni.

Scindia chuan India mite hruai haw an nih dan tur chungchangah prime minister Narenda Modi chuan Ukraine president Volodymyr Zelenskiy leh Russia president Vladimir Putin-te a biak thu a sawi. India mi awmte chu an vaiin him taka hruai haw vek tum a ni, a ti.

Ukraine ram beih a nih hnuah India mi 469 chu hruai haw an ni tawh a ni. Inrinni khan mi 219-te chu Mumbai-ah hruai haw an lo ni tawh. Nimin vek khan Ukraine aṭanga Hungary-a lut, India mi 240-te hruai haw turin thlawhtheihna tirh a ni bawk.

Ukraine ramin beih a tawh hnuah sorkar laipui chuan Ministry of External Affairs-ah control room siamin, Ukraine-a India mi awmte chungchang ngaihven leh puih dan turte a buaipui a ni.

Ukraine khawpui, Kyiv-a Indian Embassy chuan Inrinni khan border post-a sorkar official-te hriatpui leh hriattir hmasa loin, Ukraine ramri lam pan ngawt lo turin India mi awmte a chah. Ramri lamah boruak sang tak a awm a, hei vang hian an thuneitu lam hriatpui loa mahni thua kal ngawt lo turin a ngen. Zirlai ṭhenkhat, mahni thua ramri lam pan tangkhang mek an awm nia sawi a ni. Him taka India mi awmte hruaichhuah an nih dan turah Ukraine ṭhenawm rama embassy dangte nen hma an la zel tih Indian Embassy chuan a sawi.