Vawiin aṭangin Delhi-a Covid-19 khuahkhirhnate hlip vek dawn

Delhi Disaster Management Authority (DDMA) chuan Delhi khawpuia Covid-19 hripui leng vanga khuahkhirhna siamte chu vawiin aṭangin hlih vek a ni dawn tih a sawi.

Kar liam ta Inrinni khan DDMA hian meeting neiin, khuahkhirhna hlih vek a nih tur thu hi a tichhuak a ni.

Zan lam curfew, restaurant, bar leh cinema hall-a seating capacity 50% an siamte hlih a ni tawh dawn a, April 1 aṭangin zirlai naupangte chuan dan pangngaiin school an kal leh thei dawn bawk a ni. Health and family welfare department-in vantlang punkhawmna hmuna mask vuah lote Rs 2,000 chawi tura a tih ṭhin pawh vawiin aṭang chuan Rs 500-ah a tihniam. Hetih lai hian mipuite chu Covid-appropriate behaviour khauh taka zawm tura chahin, mask vuah leh taksa inkar hlata awmte chu ngai pawimawh chhunzawm zel turin a chah.

DDMA thuchhuah tarlan danin, zirlai naupang nu leh pa an rawn hnuah class 9 leh 11-te chu March 31 hma chu hybrid mode (online leh offline) hmangin zirna kalpui chhunzawm a nih tur thu a sawi. Mahse hei hian class 10 leh 12 a huam tel lo thung. DDMA chuan karliamta Zirtawpni khan khawpui chhunga Covid-19 hri leng dinhmun an enfiah hnuin, April 1 aṭanga school kal ṭan leh hi an remtih bakah hri kai thar leh test aṭanga hri kai zat an tlakhniam tak zel avangin Covid-19 khuahkhirhnate hlih hi an rel a ni.

Union home ministry chuan state leh UT-te chu hri leng hluar dan a zirin khuahkhirhna chu a awm tawka siam turin a lo ngen tawh bawk. He ngenna ang hian DDMA meeting chuan Delhi khawpui hri leng dinhmunte thlirin, hri kai thar tlahniam leh damdawi-ina dah ngai tlem zel avangin khuakhirhna tihtawp hi an rel ta a ni, tiin thuchhuah an siamah an tarlang.