PM Modi-a'n 'Vocal for Local' ṭha taka thlawp turin a ngen

Prime minister Narendra Modi chuan nimin khan thla tina radio programme a hman ṭhin, 'Mann Ki Baat' vawi 86-na hmang lehin mipuite hnenah thuchah a sawi.

PM Modi chuan hunpui, Shrivratri, Holi-te a lo thleng leh dawn a, heng hunpuiah hian ram mipuite chu ramchhunga thilsiam chhuah ngei lei uar a, 'Vocal for Local' ṭha taka thlawp turin a ngen. Heng hunpuite hi hlim taka lawm tura a chah rualin, hri leng avangin fimkhur chhunzawm zel turin a ngen nghal bawk.

Modi chuan National Science Day thleng tur pualin CV Raman leh scientist dangte zahna a hlan nghal a ni.

India-in a thil hlu tak takte hlawhtling taka a laklet theih turte sawiin, Modi chuan, "India ram aṭangin mi lim ṭhathnem tak rukchhuah niin ram hrang hrangah te hralh an ni. Heng milim lak let hi kan thiltum a ni. Kum 2013 hma kha chuan, milim 13 chiah laklet an ni a, mahse kum 2014 hnu lamah erawh chuan milim hlu tak tak 200 chuangte chu US, Britain leh Canada aṭanga laklet leh an ni," a ti.

Prime Minister chuan India culture darhzau leh hausakziate sawiin, ṭawng chungchangah pawh a hausain ram dang nena tehkhin rual loh a ni a, ṭawng chi hrang tam tak kan nei chu kan chhuang hle tur a ni, tiin a sawi.

Maan ki Baat programme hi thla tin Pathianni hnuhnung berah a nei ṭhin a, AIR leh Doordarshan network zawng zawng bakah, AIR News leh mobile app-ahte pekchhuah ṭhin a ni. 'Maan ki Baat' episode hmasa ber hi October 3, 2014 khan pekchhuah a ni.