Congress-in CBI office kawtah nawrh huaihawt dawn

Congress Party chuan Central Bureau of Investigation (CBI) Director Alok Verma, a duhthu ni loa leave laktir a, chawlhtir a nih avanga lungawi lohna lantirin vawiin hian ramchhunga CBI office hrang hrang kawtah nawrh an huaihawt dawn.

Alok Verma chawlh laktir a nih chungchangah Prime Minister Narendra Modi chu ngaihdam dil tura phutin, Verma pawh a hna ngai thawh chhunzawm tir leh turin Congress chuan an phut.

Delhi-a CBI headquarters kawta nawrh huaihawtnaah chuan party hruaitu lute an tel dawn a, state hruaitute pawh an awmna state-a nawrh huaihawtnaah an tel dawn bawk. Congress chuan dan kalh leh, ram danpui milloa CBI director chawlhtir a ni ringawt chu an dem thu an sawi.

Verma hian leave lak tir a nih chungchanga sorkar thutlukna siam hi court-ah a khing let a, vawiinah Supreme Court chuan hei hi a ngaihtuah nghal dawn a ni. CBI Director Alok Verma leh Special Director Rakesh Asthana te chu thamna sum laah an inpuh tawn a, hei vang hian Thawhlehni zan tlai tawh takah khan Prime Minister kaihhruai Appointments Committee of Cabinet chuan an pahnih hian a chawlh tir a, agency interim head atan M Nageswar Rao a ruat nghal bawk. Sorkar chuan CBI official eng emaw zat a transfer nghal bawk a ni.

Nimin zing khan Alok Vermna chenna in kawta mi pali teikual rengte chu rinhlelh thilah a personal security officer te chuan manin, Delhi Police-ten thu an zawtfiah nghal. Heng mi pali-te hian Intelligence Bureau officer an nih thu sawiin, an nihna finfiahna CGHS leh Aadhaar card-te pawh an thehlut nghal a ni. An pali hian Verma in kawtah hian zing hma tak aṭangin an teikual reng a, an awm danah an rinhlelh avangin an man ta niin officer-te chuan an sawi.