Madras High Court-in MLA 18 te banna nemnghet

Tamil Nadu Assembly speaker P Dhanapa-an unti-defection law hmanga MLA hel, AIADMK MLA 18-te a banna chu nimin khan Madras High Court chuan a nemnghet.

Rorellai AIADMK MLA 18 bante hi party hruaitu aṭanga ban, VK Sasikala leh a vahpa TTV Dhinakaran-a thlawptute an ni. Nikum khan heng MLA-te hian Governor hnenah Chief Minister Palaniswamin ban tura ngenna an thlen hnuah, speaker chuan anti-defection law hmangin MLA an nihna aṭangin a ban a ni. Ban an nih chungchang hi High Court-ah an khing zui a, mahse nimin khan High Court chuan speaker thutlukna lo siam tawh hi thlawpin a nemnghet ta zawk a ni.

High Court thutlukna siam avang hian AIADMK MLA helte hi assembly member ni tawh loin, an seat-ah hian by-election neih a ngai dawn a ni. Heng MLA 18 te seat bakah, MLA pahnih thihsan bial pahnih, a vaiin bial 20-ah by-election neih a ni ang. Bial 20 a ruah tak avangin Tamil Nadu assembly member hi 234 aṭangin 214 an awm ta rih a ni.

MLA helte ban an nihna nemnghet a nih tak avangin rorellai, CM Palniswami kaihhruai AIADMK sorkar hian seat 214-ah member 116 neiin, majority a nei pha ta a ni.