Rahul Gandhi hoin Congress in nawrh huaihawt

Congress president Rahul Gandhi leh party hruaitu hlunte hoin nimin khan eptu party-te chuan CBI director chawlh tir a nih chungchangah lungawi lohna lantirin CBI head-quarters bulah an pungkhawm. Gandhi leh hruaitu dangte chu man an ni a, mahse reilote hnuah chhuah leh nghal a ni.

Eptu party te hian sorkar laipuiin CBI Director Alok Verma chawlh a laktir chungchangah lungawi loin, sorkar chu agency inrelbawlnaah inrawlhah an puh a ni. Hei vang hian CBI hotu chawlhtir a nihna chu sut a, a hna ngai thawh chhunzawm tir turin an phut.

Nimina Congress party kaihhruaia nawrh huaihawtnaah hian Trinamool Congress, Aam Aadmi Party, CPI(M) leh party dang hotute pawh an tel.

Rahul Gandhi chuan kawng-zawhnaah hian hma hruaiin, mi ṭam takin an zawm a ni. Sorkar laipui thiltih dan an demna thu ziakte an keng bawk. Gandhi leh hruaitu dangte hi CGP complex-a CBI headquarters bulah police-te chuan lo dangin an man zui a ni. Nimina nawrh huaihawt hi Delhi bakah, ramchhunga CBI office hrang hrang bulah neih a ni. Gandhi chuan sorkar laipuiin zan tlai tawh taka CBI hotu chawltirna thupek siam a nih chu thil tenawm leh ram danpui kalh a ni tiin, he thil hi Prime Minister Narendra Modi-an Rafale fighter jet deal chungchang chhuina tur lo dan a tumna niin a sawi.

"Engvangin nge M Nageshwar Rao hi CBI director atana hman-hmawh taka ruat a nih? Party dangte pawhin Congress rual hian kan lungawi lohna kan lantir ve a ngai a ni" tiin AAP hotu Sanjay Singh chuan a sawi. West Bengal Chief Minister Mamata Banerjee-i pawhin CBI chu 'BJP bureau of Investigation' BBI a ni tawh a ni, a ti bawk.

Rahul Gandhi leh party hruaitu ṭhenkhat chu CBI office kawta nawrh an huaihawt vangin man an ni a, Lodhi colony Police station-ah hruai an ni. Mahse nimin tlai vek khan chhuah leh nghal an ni a, chhuah an nih hnua thu a sawiah, Gandih chuan Prime Minister chu a tlanchhe thei a ni maithei, mahse a tawp thlengin a biru thei dawn lo a, thudik tak chu a la langchhuak thuai dawn a ni, a ti. CBI Director chawlhtir ringawt chu a mangang thiltih a ni tawh a ni tiin a sawi. PM Modi chuan India rama institution tinte chu a tichhe zo tawh a ni, tiin Congress hruaitu chuan a sawi.

CBI hotu chhuitu tur ruat:
CBI Director Alok Verma leh Special Director Rakesh Asthana te eiru leh thamna sum laa an inpuh tawn chungchangah Supreme Court a inrawlh dawn.

Chief Justice of India Ranjan Gogoi chuan nimin khan Central Vigilance Commission (CVC) an puhna chungchang chu kar hnih chhunga chhui fel turin a ti. CVC thil chhui hna hi Supreme Court judge hlui AK Patnaik-an a enpui dawn a ni. Ni 14 chhungin an hna hi zo tura tiin, November 12-ah hearing a nei leh dawn a ni.

Court chuan CBI interim head, M Nageshwar Rao chu November 12-a agency hotu chungthu a ngaihtuah fel hma chuan policy chungchangah thutlukna engmah lo siam lo tura tiin, agency hna kalphung enpuina mawhphurhna chauh la rih turin a ti. Rao-an thutlukna a lo siam tawh chu sealed envelope-ah thehlut vek turin a ti bawk.

Delhi Chief Minister Arvind Kejriwal-a chuan CBI buaina chungchangah Supreme Court a inrawlh chu lawmawm a tih thu sawiin, agency zahawmna pawh vawnnun zel a nih a beisei thu a sawi.

CBI thupuangtu Abhishek Dayal chuan nimin khan Alok Verma chu chawlhtir ni mah se an Director a la ni reng tih sawi a, Rakesth Asthana pawh Special Director a la ni reng a ni, a ti. Mahse agency hotute hi thubuai siamsak an nih vangin, an chungthu relfel a nih hma chuan agency hotu an nih anga an thuneihna leh an mawh-phurhnate an hmang thei lo a ni. Dayal chuan Nageshwara Rao chu interim head atan chauha dah a ni tih sawiin, heihi agency nitin hna te tluang taka kalpui a nih theihna tur atan chauh a ni, a ti.