PM Modi-a'n Ukraine chungchangah high level meeting ko ; India mite hruai hawnaa pui turin minister 4 zin dawn

Prime minister Narendra Modi chuan Russia-in Ukraine a beih mekah, Ukraine rama India mi awmte hruai chhuah an nih dan tur chungchangah nimin zing khan meeting a ko. Hei hi Ukraine chungchang avanga ni hnih chhunga PM-in meeting a koh vawi hnihna a ni.

Meeting-ah hian Ukraine-a India awm, a bikin zirlai awmte hruai haw hna thawh mekna kawnga pui turin, union minister pali - Hardeep Puri, Jyotiraditya Scindia, Kiren Rijiju leh VK Singh-te chu Ukraine ṭhenawm ramahte special envoy anga kal tura an rel a ni.

Pathianni tlai khan PM hian foreign minister S Jaishankar, foreign secretary Harsh Vardhan Shringla, cabinet secretary Rajiv Gauba leh official dangte meeting neihpuiin, India mi te hruai haw dan tur hi an lo sawiho tawh bawk.

Ukraine-ah hian India mi zirlai 16,000 bawr vel awmin, an zinga eng emaw zat chu ramri lamah emaw tawmbukah emaw an tan mek bakah ṭhenkhat chu bomb shelter leh hostel basement-ah te an biru mek a ni. Kar liam ta Ningania Russia-in Ukraine a run ṭan hma khan zirlai tlem azawng chuan Ukraine hi an chhuahsan hman a, mahse beih an tawh hnuah Ukraine hian a airspace-te a khar nghal avangin midangte chu an chhuak thei ta lo a ni.

India hian Ukraine ṭhenawm - Romania, Hungary, Slovak Republic leh Poland aṭangin thlawhtheihna hmangin thiarchhuah hna hi a thawk a, Ukraine rama India mi awmte pawhin heng ramte hi an theih dan angin an pan hlawm. Mahse zirlai tam tak chuan khawvawt tak hnuaiah kein ramri lam hi pan a ngai a, official aṭanga tanpuina an dawn loh bakah ramri kan maite chu a harsat thu an sawi.

Sorkar chuan "Operation Ganga" tih hmangin India mite hruai haw hna hi a kalpui a, kar liam ta Inrinni khan thlawhtheihna a tirh hmasa ber chuan Bucharest aṭangin mi 219 a rawn phur haw a ni. Nimin thleng khan India mite hruai hawna tur hian thlawhtheihna panga tirh a ni tawh.