Khawvel khawpui zinga hri kai pung chak ber Delhi
Delhi-a Covid-19 hri kai chu an pung chak hle a, India mai ni tawh loin khawvel khawpuite zinga hri kai pun chakna ber a ni mek.
Hri kai an pun chak leh tak avangin Delhi chief minister Arvind Kejriwal chuan nimin khan hri inkaichhawn tamna, bazar puite chu ni eng emaw zah chhung khar rih turin sorkar laipui an ngen mek tih a sawi.
October thla aṭang khan Delhi-ah hian hri kai an pung chak ṭan leh a, tun hla phei chuan chawhrualin nitin hri kai thar hi mi 4,000 chuang awm ziah ang a ni. Hei vang hian hri kaiten enkawlna kawnga pui turin paramilitary force adoctor 75 leh healthcare worker (paramedic) 250 chu thlawhtheihna hmanga Delhi-a dah luh an ni. Heng mite hi Assam, Tamil Nadu, Gujarat, Madhya Pradesh, Uttarakhand leh Rajasthan amite an ni. Delhi-ah hian Covid-19 hri leng thawh thumna a thleng mek nia sawi a ni.
Delhi sorkar chuan containment zone-a a hma lak dan chu ennawn hna a thawk mek. November 1 khan containment zone-a hri kai thar hi mi 3,359 an awm a, November 15 khan 4,358 an awm bawk. Containment zone-a hri kai an tam chhoh zel avangin Delhi sorkar chuan containment zone-a hmalakna neih dan tur thlak a tum a ni.
Official-te chuan containment zone-ah hian door-to-door survey neih tum a nih thu an sawi.
Thawhṭanni khan Delhi-ah hian Covid-19 hri kai thar hi mi 3,797 an awm a, anni nen hian hri kai tawh zawng zawng hi 4,89,202 an awm tawh a ni. Thawhṭanni vek khan he hri vanga thi hi mi 99 an awm a, Delhi-a Covid-9 vanga thi tawh zawng zawng hi mi 7,713 an tling tawh bawk.
November 11 kha Delhi-a hri kai thar tam ber ni a ni a, hemi ni hian hri kai thar mi 8,593 an awm a, thi mi 85 an awm bawk.
Lockdown puan tum lo
Delhi health minsiter Satyendar Jain chuan Covid-19 kai pun belh zel mah se khawpui puma lockdown puan tumna an nei lo tih a sawi.
Minister Jain chuan, lockdown puan ringawt chu hri darh tur venna kawng ṭha ber nia a ngaih loh thu a sawi a, tuna pawimawh ber chu mitinten hmaituamna an vuah ṭhat chu a ni, a ti.
Delhi-a hri kai hmuh chhuah an tamna chhan pakhat chu khawpui pawn lam mi, mahse Delhi address hmanga test-te an nih thu sawiin, khawpui chhunga test an neih zinga 25-30% chu Delhi-a cheng nghet ni lo, pawn lam mi niin a sawi. Mahse test an neih duh a nih chuan tumah an hnar lo tih a sawi nghal bawk.