BRICS Summit-ah PM a tel

BRICS Summit vawi 12-na chu nimin khan virtual hmanga neih a ni a, he summit-ah hian prime minister Narendra Modi pawh a tel a ni. 

Summit-ah hian China president Xi Jinping leh Modi hi an tel dun a, hei hian media-te ngaihven a hlawh phah zual a ni. Kumin June 15 aṭang khan India leh China chu nasa zawkin ramri chungchangah an inhmu thiam lo a, hei vang hian summit-a an rorelna turah ram hruaitu pahnihte hi an inmil loh fo rin a ni. 

Mahse tunhnai khan commander level-ah India leh China sipaite chuan inbiakna an nei leh a, kha inbiakna kha a ṭha zawngin a thawk niin media ṭhenkhatte chuan an tarlang. Hei vang hian India leh China inkara buaina chu a ziaawm mek niin media-te chuan an tarlang bawk. 

Kumina BRICS Summit hi Russia chuan a kaihruai a, summit thupui (Theme) atan "Global Stability, Shared Secu­rity and Innovation Growth" tih hman a ni. Nakkuma summit chu India-in a thleng ang. 

BRICS member ram pangate hi Brazil, Russia, India, China, leh South Africa-te an ni. Kum 2009, June 16 khan summit hmasa ber chu neih a ni a, kha summit kha Russia chuan a host a ni.