Donald Trump-an India sawmna hnar

Sorkar laipuiin nakkum Republic Day lawmnaa khuallian tura US President Donald Trump a sawmna chu Trump hian a lo hnar nia sawi a ni.

August thla tir lam kahn White House press secretary Sarah Sanders-i chuan President Trump-an India tlawh tura sawmna a dawn thu hi a lo sawi tawh a, mahse he sawmna chungchangah hian thutlukna siam a la ni lo tih a sawi a ni.

Foreign ministry chuan hemi chungchangah hian thuchhuah a la siam lo a, Delhi-a American embassy chuan US President zinna tur chungchangah hi White House chauhin a sawi thei niin a tarlang. US official-te thlasik laiin State of the Union address neih a nih avangin January thlaah President Trump hi India-ah a zin a rinawm loh thu an lo sawilang tawh bawk.

Mahse state of the Union address hi kumtinin January thlaah neih ṭhin ni mah se, US President hlui Barack Obama khan India ramah ṭum hnih rawn zinin, kum 2015 khan Republic Day lawmna hun pawh a rawn hmanpui a ni. President Trump-an sawmna a hnar tak avangin PM Modi-a kaihhruai sorkar chuan Republic Day lawmnaa khuallian tur hian ramdang hruaitu sawm tur dang a ngaihtuah a ngai dawn ta a ni. Kum 2016 khan France President Francois Hollande chu khuallian niin, kum 2014 khan Japan Prime Minister Shinzo Abe chu khuallian a lo ni tawh bawk.