Maan Ki Baat: PM-in Run for Unity-a tel turin mipuite sawm

Prime Minister Narendra Modi chuan thla tina radio programme a hman ṭhin, Maan Ki Baat chu nimin khan a hmang leh a, mipui a bikin ṭhalaite chu October 31-a Sardar Vallabhbhai Patel-a piancham puala 'Run for Unity' buatsaih tura tel turin a sawm.

PM chuan Inrinni-a Infantry Day hman chungchang sawichhuakin, hetih hunlaia Home Minister Sardar Patel chuan Indian Army-a ṭhalai rualte chu Jammu and Kashmir-a firfiakte bei turin a ti a ni, a ti. Modi chuan October 31-a PM hlui Indira Gandhi thih cham thleng tur pawh sawiin, Gandhi zahna a hlan bawk.

Modi chuan Sardar Vallabbhai Patel chuan hmathlir ropui tak nei nia sawiin, kumina a piancham lo thleng tur chu a special bik dawn hle a ni, a ti. A pianchamah zahna hlanin, a puala lim siam 'Statue of Unity' chuan India ram mipuite tan hlan a ni dawn a ni, a ti. He lim hi Namrada lui bulah siam niin, America-a lim lar tak, Statue of Liberty let zeta sang a ni dawn a ni.

Asian Games leh Asian Para Games neih zawh taka India infiammi telte fakin, para-atlelete te chu a hmuin, harsatna hrang hrang paltlang tura an beihna te chu a ropui hle tih Modi chuan a sawi. Heng games neih takah hian India chuan medal 72 lain record thar a siam a ni, a ti. PM chuan Odhisha-a Hockey World Cup neih tur pawh sawilangin, Indian sportsperson-te chuan ram an tihmingṭha dawn a ni, a ti.