Delhi CM hlui Madan Lal Khurana a thi

Delhi Chief Minister hlui MadanLal Khurana chu kar kalta Inrinni khan kum 82 mi niin Delhi-ah a thi.

Khurana hi kum 1993-1996 inkar khan Delhi chief minister a ni a, Bharatiya Janata Party (BJP) aiawh niin, RSS member a ni bawk. Khurana hi Delhi CM pathumna a ni. Kum 2004 khan Rajasthan Governor atan ruat leh a ni.

BJP hruaitu hlun Khurana hian kum nga kalta khan brain haemorrhage neiin hemi hnu hian a chak lo chho a, tunhnaiah awmna leh khawsik te neiin Inrinni zing aṭang khan a zual a, Inrinni zan dar 11 khan Delhi-a a chenna inah a thi a ni. A nupui leh a fate pathum a thihsan a, thla hmasa khan a fapa pakhat chu alo thi tawh bawk a ni.

Prime Minister Narendra Modi leh BJP hruaitu hrang hrangte chuan Khurana an ui thu hi sawiin, a chhungte an tawrhpui thute an sawi. Jan Sangh leh BJP tana mi pawimawh tak a nih thu te sawiin, Delhi-a BJP tihchakna tura a hmalakna te hriatreng a nih tur thu PM chuan a sawi.