Malabar naval exercise 2020 thawh hnihna nei ṭan
Malabar naval exercise 2020 thawh hnihna chu Northern Arabian Sea-ah nimin (November 17) aṭang khan neih ṭan a ni a, he exercise hian November 20 thleng a awh ang.
Nimin aṭanga Malabar naval exercise thawh hnihna neihah hian Quad member ram pali, India, USA, Japan leh Australia-te an tel. A hmaa exercise neihah Australia hi tel ngai lo mah se India-in a sawm hnuah kuminah Australia hi a tel ve ta a ni.
Malabar naval exercise thawh khatna hi November 3-6 khan neih a lo ni tawh a, thawh khatna hi Bay of Bengal, Visakhapatnam tuipui kamah neih a ni. Kumina he exercise neih hi quad ramten kum 13 hnua a huhoa exercise an neih hmasak berna a ni.
Quad Navy-ten thawhhona ṭha tak an neih theih nan he exercise hi buatsaih a ni a, Indian Navy-a Vikramaditya Carrier Battle Group leh US Navy-a Nimitz Carrier Strike Group chuan he exercise hi an kaihruai a ni. Japan aṭangin Japan Maritime Self-Defence Force (JMSDF) an tel a, Australia aṭangin Royal Australian Navy (RAN)-te an tel bawk.
Exercise thawh hnihnaah hian Indian Navy-te chuan INS Vikramaditya an ken tel bakah, fighter leh helicopter air-wing-te pawh an keng tel bawk a ni. US Navy-te hian USS Nimitz, cruiser USS Princeton, destroyer USS Sterett an keng a, hei bakah hian maritime reconnaissance aircraft P8A pawh an keng tel bawk.