Ayodhya case : SC-in nakkuma ngaih- tuah turin a dah

Ayodhya-a ram inchuh, Ram Janmabhoomi-Babri Masjid awmna hmun thuma ṭhen tura kum 2010-a Allahabad High court thutlukna siam, Supreme Court-a khin letna chu nakkum January thlaa ngaihtuah tura dah a ni.

Nimin khan Supreme Court bench chuan Ayodhya case hi ngaihtuahin, nakkum January thlaah ngaihtuah turin a dah a, mahse a ni tak erawh tihfel a la ni lo a, chawlhkar khatnaah ngaihtuah a ni ang.

Kum 1992 khan Ayodhya-a Babri mosque chu karsewaks or Right-wing volunteer te chuan Lord Ram temple sakna turin an tihchhiatsak a, he mosque awmna hi Lord Ram pianna hmun niin an sawi a ni. Hemi hnu aṭang hian Muslim leh Hindu te chuan Ayodhya ram hi neitu nih an inchuh chhunzawm ta zel a ni.

Kum 2010 khan Allahabad High Court chuan Ayodhya ram inchuh hi hmun thumah ṭhenin, Nirmohi Akhada, Ram Lalla leh Sunni Muslim Waqf Board-te a sem a, mahse court thutlukna hi Supreme Court-ah khin zui nghal a ni.

BJP chuan kum 2014 Lok Sabha inthlanpui neih dawna a manifesto-ah Ram temple sak hi a telh a, 2017 Uttar Pradesh election neih dawnah pawh a telh bawk. Heng inthlan pahnihah hian BJP hi an chak zui nghe nghe a ni.

Supreme Court-in Ayodhya case ngaihtuah hun a sawn chungchangah, Hindu pawl Vishva Hindu Parishad (VHP) chuan Hindu-te chuan Ayodhya case-ah court rorelna chu an nghak reng thei lo tih sawiin, sorkar laipui chu Ram temple sak a nih theihna tur dan siam turin a phut. VHP working president Alok Kumar chuan Prime Minister Narendra Modi-a kaihhruai sorkar chu Parliament thlasik ṭhutkhawm neih hunah dan hi siam ngei turin an phut tih a sawi. A hma pawhin Rashtriya Swayamsevak Sangh (RSS) pawhin Ram temple sak a nih thuai theihna tura dan siam turin sorkar hi an lo nawr tawh bawk.

VHP-ten Ram temple sak theihna tur dan siam tura sorkar an nawrna hi All India Majlis-e-Ittehadul Muslimeen (AIMIM) chief Asaduddin Owaisi chuan a chhang let nghal a, an ngam a nih chuan dan chu siam turin a ti. Hyderabad MP Owaisi chuan Ram Temple sakna turin dan siam a ni dawn tiin BJP, RSS leh VHP mi leh sate chuan an vau reng a, hei hi an ngam chuan kal tlangpui leh sela, eng nge lo thleng zel tur kan thlir ang, tiin a vau let.