CBI Deputy SP Bassi-an transfer a nih chungchang khing let

Central Bureau of Investigation (CBI) Deputy SP AK Bassi chuan kar hmasaa transfer a nihna thupek tihchhuah a nih chungchang chu ngaihtuah turin nimin khan Supreme Court-ah a thlen.

Supreme Court-ah ngenna a thehluhah, Bassi chuan CBI Special Director Rakesh Asthana chuan thamna a la ngei a ni tih finfiahna pawh a nei tih a sawi a, finfiahnate lakhawm tura technical surveillance nei turin a ngen. Hei bakah hian Asthana chungchang chhui tura Special Investigating Team (SIT) din turin a ngen bawk.

Bassi hi Asthana-an thamna sum a la nia puhna chungchang chhuitu investigating officer zingah a tel a ni. Mahse kar kalta Nilaini khan CBI chuan Port Blari-a Deputy SP, Anti-Corruption Branch (ACB) a awm turin a sawn a, top officer eng emaw zat chu sawn an ni bawk.

Asthana hian Central Vigilance Commission (CVC) hnena complaint a thehluhah, Bassi hian CBI Director Alok Verma-a thupek angin a chungchang chu thlei nei takin a chhui niin a sawi. CBI hotu lu pahnih, Verma leh Asthana te hi thamna sum laa an inpuh tawn vangin sorkar laipui chuan chawlh a laktir ve ve a ni. Joint Director M Nageshwar Rao chu interim chief atan a ruat nghal a ni.

CBI Director Verma chuan sorkar a thuneihna leh a mawhphurhna te chawlhtir a, Rao hnena charge a pek avanga lungawi loin Supreme Court-ah a zualko a ni.

Supreme Court chuan October 26 khan CVC hnenah Vermna-an thamna a dawng nia puh chungchang chu SC court hlui, Justice AK Patnaik enpuina hnuaiah kar hnih chhunga chhui fel turin a hriattir. Hemi rual hian CBI hotu lailawk atana dah M Nageshwar Rao chu Verma chungchanga thutlukna siam a nih hmaa thutlukna lian tham leh policy siam lo turin a ti a, CBI hna kalphung pangngai taka a kal theihna tur chauh ngaihtuah turin a ti.