Hindu-te BJP chauh vote tura hrilhtu minister lakah FIR thehlut

Rajasthan Minister Dhan Singh chu October 26-a a thusawi, Rajasthan-a Hindu zawng zawngte BJP chauh vote tur tih a sawi avangin a lakah FIR thehluh a ni.

Singh hian December 7-a assembly inthlan an neih tura atana rally an neihnaah he thu hi a sawi a ni. Minister chuan, "Rajasthan-ah chuan Hindu zawng zawng chuan BJP chauh an vote tur a ni. Muslim-ten a huhoa Congress an vote thei a nih chuan, Hindu zawng zawng pawhin BJP tan an ti ve thei a ni", a ti. He a thusawi hi sakhaw inkara inhuatna chawk tho thei a nih avangin minister lakah hian FIR ziahluh a ni ta a ni.

Hetihlai hian Rajasthan Home Minister Gulab Chand Kataria chuan minister Dhan Singh-a thusawi hi an party ngaihdan a ni lo tih sawiin, BJP chuan sakhaw behchhanin vote a zawng ngai lo, a ti. "Voter chuan sakhua bik a nei lo a, ram hmasawnna tura thawktu chu a vote mai a ni. Kan party hian sakhaw hmanga vote zawn kan ti ngai lo", tiin a sawi.