Tualchhung miten Statue of Unity duh lo

Sardar Patel hriatrengna atana Kevadiya, Gujarat-a a lim meter 182 zeta sanga siam chu a chhehvel thingtlang khuate chuan an duh lo hle a, he lim hawnna inkhawm neih tur pawh boycott an tum thu an sawi.

Sardar Sarovar Dam bula thingtlang khaw 22 hotute chuan Thawhṭanni khan Prime Minister Narendra Modi chu open letter thawnin, vawiina Statue of Unity hawng tura a kal tur pawh an awm dawn lo tih an sawi. He milim siam vang hian a chhehvel an sum lakna hnar te tihchhiat a ni tih an sawi a ni.

Khaw hotute chuan PM hnena open letter an thawnah, milim siamna bula ramngaw, lui, tuikhawhthla, ram leh thlai chinna ramte chu kum tam tak eizawnna atana an lo hman tawh a nih thu a sawi, mahse milim dinna tur hian heng hmunte hi nasa taka tihchhiat a ni, an ti. Hei vang hian an eizawnna tihchhiat sak an ni a, hetichunga a lawmna lo neih chu an theih loh thu an hrilh. "October 31 a i lo kal tur pawh kan lawm lo che a, kan duh loh chunga i lo kal lui a nih pawhin he hmuna hian lawm i hlawh lo ang", an ti.

Mi tam takte rim taka thawha an sum hmuhna te chu Statue of Unity project hian a tihchhiatsak a, he milim siamna atana sorkarin sum tam tak a sen laiin thingtlang bial tam tak chuan an mamawh em em school, hospital leh tui thianghlim pawh an la nei thei lo tih an sawi. Sardar Patel ngei pawh khan an chunga thil thleng nise pawi a tih hle an rin thu an sawi bawk.