Bihar sorkarin zu rui man te'n jail an pumpelh theih dan ruahman

Bihar sorkar chuan zu khapna dan an hman mekah, dan loa zu tawlhru leh zuarte an man theih nan ruahmanna thar a siam.

Excise depatment-a Deputy Commissioner , Krishna Kumar chuan zu rui an mante chuan an zu lakna chanchin kimchang an hrilh theih chuan tanina khung an pumpelh theih tur thu a sawi.

"Zu rui kan mante chu zu zuartu leh a leina hmun kan zawt dawn a ni. A thusawi chu kan bawhzui ang a, a dik a nih chuan thu thlentu hi taninah khung a ni lo ang," tiin Kumar chuan a sawi.

Bihar state-a hmeichhiaten an state-a zu hluar leh zu ngawlvei an pun avanga sawiselna an thlen hnuah, chief minister Nitish Kumar kaihhruai sorkar chuan April 2016 aṭang khan zu zawrh leh in khap burna dan hi a siam a ni.

Zu khapna dan hman a nih hnuah state chhunga zu chhe in vangin mi 50 chuangin nunna an chan tawh a, hei bakah police-te chuan state pawn lam aṭanga lutte dap a man fo avang te, inneih lawmna hmunte an dap ṭhin avangtein he dan hian sawisel pawh a hlawh phah hle. Mahse CM chuan an sawiselnate hi chhang letin, "Tualthah khapna dan a awm chung pawhin tualthahna chu a thleng reng a ni," tiin Bihar Prohibition Law chu a ṭhat tawk thu a sawi.

Zu khapna dan an hman hi a hlawhtlin theihna turin CM hian vantlang inkhawmah pawh a sawi nasa a, hei bakah dan bawhchhiate dapna kawngah police-te chu helicopter, drone, satellite phone, motorboat leh sniffer dog hmangin thuam chak an ni.