Mamata-in all party meet ko turin PM Modi ngen

West Bengal chief minister Mamata Banerjee chuan Thawhṭanni khan prime minister Narendra Modi chu tualchhunga inlungrual lohnate dah ṭha a, Ukraine kaihhnawiha buaina thleng mek chungchangah all-party meeting ko turin a ngen.

PM Modi dodaltu lian tak zinga mi, Mamata chuan Ukraine buaina tawk mek chungchangah state-a inhmuh thiam lohna an neihte chu dahṭha rih a, PM Modi chu theihtawpa ṭanpui a tum thu a sawi. "Khawvelin buaina a tawh mek karah hian, ram anga kan ṭanrual zia lantirna atan kan inhmuhthiam lohnate kan dahṭhah a ngai a ni. Kan ram zahawmna sawi nghinga a awm lohna turin hma kan la a ni. Ram dang nena thawhhona nghet tak kan neih chhunzawm theihna atana hei hi kan ti a ni," tiin Mamata chuan PM hnena lehkha a thawnah a tarlang.

"Senior chief minister kan nihna anga central leh state sorkar inkara inpawhna ṭha a awm theihnan leh, national political party hotu ka nihna angin, Ukraine-a indona thleng mekah remna leh muanna a awm a, ram inbeihna thleng kan duh lohzia kan lantir a ngai tih ka sawi nawn duh a ni," a ti.

CM Banerjee chuan, "Zalenna kan chan hnu khan, India chu khawvelah remna leh muanna duhtu; tharum thawhna, ram inrunna leh intihbuaina a thlen loh nana hmalatu anih avanga hriat hlawh a ni," tiin a sawi.

PM Modi-a'n President Kovind a hmu
Ukraine-in run a tawh hnua an rama India mi awmte hruaichhuah hna thawh mek karah, prime minister Narendra Modi chuan nimin khan president Ram Nath Kovind hmuin, Ukraine buaina leh an hma lak dante a sawipui.

PM Modi hian Thawhṭanni khan Ukraine chungchang avang hian high-level meeting a lo ko tawh bawk a, sorkar chuan Ukraine-a India mi tangkhangte an vaiin him taka hruai haw vek a tum thu an sawi a ni. Hemi hma, Pathianni khan PM hian Ukraine chungchangah high-level meeting a lo ko tawh bawk a ni.

Ukraine-a India mi, a bikin zirlai tangkhang mekte, beih an tawh hnua Ukraine ṭhenawma lutte hruai haw hna thawh mekah special envoy atan union minister pali - Hardeep Singh Puri, Jyotiraditya Scindia, Kiren Rijiju leh Gen (Retd) VK Singh-te ruat an ni a, anni hi Ukraine ṭhenawm ramahte kalin, India mi tangkhangte hruai haw dante an ngaihtuah pui ang.

Sorkar laipui chuan Ukraine-a India mi awmte hruai haw hna hi 'Operation Ganga' hmangin a nei mek a, 'Operation Ganga' mission pual hian Air India chuan special flight a tir ṭhin a ni.