India-ah thla 2 hnua hri kai tlem ber ni thleng

India ramah Thawhṭanni khan coronavirus kai thar mi 6,915 awm belh lehin, thla hnih dawn hnua Covid-19 kai an hmuhchhuah tlem ber ṭum a nih thu Union ministry chuan a tarlang.

Pathianni khan hri kai thar mi 8,013 awmin, nikum December thla hnua hri kai thar mi 10,000 hnuailama an awm ṭum khatna a ni bawk.

India rama hri kai hmuh chhuah tawh chu mi 42,931,045 niin, thihpui 5,14,023 an awm tawh.

Thawhṭannia hripui vanga thi mi 180 zingah a tam zawk, mi 110-te chu Kerala mi an ni. Hri kai thihpui zat, case fatality rate chu 1.20% a ni mek.

Ministry data-a a landanin hri kai mek, active case hi 92,472-ah an tlahniam tawh a, hri kai tawh zat aṭangin 0.22% a ni. Ramchhunga Covid-19 kai dama chhuahtir, recovery rate chu 98.59% in a sang chho leh tih ministry chuan a sawi bawk.

Hri kai thar tlahniam zelah nitina hri kai zat, daily positivity rate pawh 0.77% in a tla thla a, kar tina hri kai thar, weekly positive rate chu 1.11% a nih thu ministry chuan a sawi. Ramchhungah Covid-19 vaccine dose vbc 177.70 chuang semchhuah a ni tawh a ni.