PM-in Rs vbch 2,389 senga siam Sardar Patel lim a hawng

Prime Minister Narendra Modi chuan nimin khan Gujarat-ah cheng vaibelchhe 2,389 senga siam, India ram Home Minister hmasa ber Sardar Vallabhbhai Patel-a lim siam chu a hawng a, ram mipuite tan a hlan.

Sardar Patel-a lim siam hi Statue of Unity tih niin, meter 182-a sang a ni a, khawvela milim siam zinga sang ber a ni. Gujarat-a Narmada lui bula Sadhu Bet Island-ah siam a ni. Khawvela milim sang ber nilai, China-a Spring Temple Buddha aiin meter 29 in a sang a, New York-a Statue of Libery aiin a let dawnin a sang bawk.

Statue of Unity hi ton 67,000 a rit niin, lirnghing leh thlipui na tak pawh dawl thei tura duan a ni. A pawn lamah hian bronze panel 12,000 ve hman a ni a, hei ringawt pawh hi ton 1,850 vel zet a ni. Milim dinna leh a chhehvel hi square meter 20,000 chuanga zau niin, artificial lake metre 12-a thui siam a ni bawk.

Nimina PM-in Statue of Liberty a hawn zawh hian a lawmna atan Indian Air Force thlawhtheihna pathum chu milim chungah hian thlawkin, tricolour an siam a ni.

PM Modi chuan Statue of Unity chuan khawvel hmun hrang hrang aṭangin khualzin tam tak a hip thei dawn niin a sawi a, he lim hi India ram inpumkhatna leh tumruhna lantirna a ni, a ti. Patel hi India rama Home minister leh deputy prime minister hmasa ber niin, India ramin zalenna a hmuh hnuah state hrang hrangte chu inpumkhat a, Indian state hnuaia awm tura a hneh theih avangin 'Iron Man of India' tia hriat lar a ni.

Gujarat sorkar chuan Patel lim hmang hian khualzin tam zawk hip luh an inbeisei a, nikhatah tlawhtu mi 15,000 vel an neih theih an beisei. Lim siamna atana sum senso zinga a zahve aia tam hi Gujarat sorkarin a tum a, a bak chu mipui thawhkhawm leh sorkar laipui aṭanga a dawnte a ni. He lim siam hi PM Modi-a project pawimawh zingah a tel a, kum 2010-a state chief minister a nih laiin Patel-a lim siamna tur hian bul a lo ṭan tawh a ni.

Kum 2013-a India Prime Minister nih tuma a campaign lai pawh khan Modi hian Patel-a India prime minister hmasa ber a ni lo chu India mipui zawng zawngin pawi an ti a ni, a ti. Tunhnaiah Modi-a party, Hindu nationalist Bharatiya Janata Party (BJP) chuan Patel-a ropuina chawi lar thar leh tum hian hma an la nasa hle.

Nimina Statue of Unity hawn hi a awmna chhehvel biala thingtlang mite chuan an duh lo hle thung. He milim siamna tur hian an ei hnar tam tak tihchhiatsak an ni tih sawiin, ṭul loa sorkarin sum tam tak a senralna mai nia an ngaih thu an sawi. Milim siamna tura an ram an hmansakah zangnadawmna an dawng ṭha lo a, a intuamhlawmna tur leh hna pek an tiam pawh tun thlengin tihhlawhtlin a la ni lo tih an sawi. Prime Minister Narendra Modi leh Chief Minister Vijay Rupani thlalak tarte chu la thlain an hal zui bawk.