PM hlui Indira Gandhi zahna hlan

Nimin khan India Prime Minister hlui Indira Gandhi thih champha a ni a, hruaitu hrang hrangten India rama hmeichhe Prime Minister ni thei hmasa ber leh awmchhun zahna an hlan. Indira Gandhi hi kum 1984, October 31 khan New Delhi-a a chennaah a bodyguard-ten an kaphlum a ni.

Congress president Rahul Gandhi, UPA chairperson Sonia Gandhi, PM hlui Manmohan Singh-te chuan Indira Gandhi thlanah pangpar an dah a, Rahul Gandhi chuan a twitter-ah a pi chu a chhuan thu leh, thil tam tak a zirtir thu te, ram mipuite tana a inpek thute a ziaklang. Congress official twitter-ah pawh Indira Gandhi chu India ram hruaitu chak ber zingah mi a nih thu sawiin, a kaihhruaina hnuaiah India chuan hnehna ropui tak, hmasawnna nasa leh hnam hrang hrangte dinhmun chawikanna a hmu a ni, a ti.