SC-in Rafale deal siamna zat thehlut turin sorkar hrilh

1st November, 2018

Supreme Court chuan sorkar laipui hnenah France nena Rafale fighter jet leina tura inremna an siamna zat chu kimchang takin ni 10 chhunga thehlut turin nimin khan a hriattir.

NDA sorkar leh France sorkarin Rafale deal an siam chungchanga laywer pahnih Manohar Lal Sharma leh Vineet Dhanda ten PIL an thehluh chu nimin khan Chief Justice Ranjan Gogoi kaihhruai, judge pathum awmna bench chuan a ngaihtuah a ni.

Sorkar laipui chu inremna siamna zat leh hriat tur pawimawh dangte thehlut tura tiin, November 14-a ngaihtuah chhunzawm leh turin dah a ni. Nimina petition thehluhte ngaihtuahnaah hian sorkar aiawh, Attorney General KK Venugopal chuan fighter jet man chu thil lian tham, puanzar mai loh chi a nih thu a sawi. Hei vang hian court chuan sorkar laipui hnenah hemi chungchangah hian affidavit thehlut turin a ti ta a ni.

October 10 khan SC chuan sorkar laipui hnenah Rafale deal siam chungchanga thutlukan a siam dante, a man zat leh technical information-te chu sealed cover-a thehlut turin a lo ti tawh a ni.

Dassault Aviation chuan India-in France aṭanga Rafale fighter jet 36 a lei tur hi nakkum aṭangin a rawn thawnluh theih beisei a ni. He inremna siam a nih danah hian eptute party, a bikin Congress party chuan sorkar laipui chu na takin an sawisel. Congress president Rahul Gandhi chuan Prime Minister Narendra Modi chu he inremnaah hian Anil Ambani-a firm, Reliance Defence chu duhsakna hleihluak taka lantirah a puh.

Tun thla tir lam khan France news website Mediapart-a investigative report tihchhuahah, Dassault Aviation chuan India rama Rafale jet 36 supply-na tur contract hmu tur hian Anil Ambani-a firm chu thawhpui an remti ngei ngai niin a lo tarlang tawh a ni. Hei hi Dassault Aviation company document leak aṭanga senior executive thusawi an hriat a ni.

Prime Minister Narendra Modi chuan kum 2015, April 10-a Paris-a hetihlaia France President Francois Hollande nena inbiakna an neih hnuah Rafale jet 36 lei tur thu hi a puang a, kum 2016 September 23-ah inremna hi an ziakfel a ni.