Delhi pollution : Insawizawia chhuak lo turin mipuite ngen

Delhi khawpui boruak chu a bawlhhlawh belh zel avangin Central Pollultion Control Board chuan mipuite chu November 1-10 chhung insawizawi tura tlanchhuak lo tur leh, public transport hmang lo turin a ngen.

Nimin aṭang khan Delhi leh National Capital Region (NCR)-ah pollution veng tura ruahmanna siamte chu kalpui ṭan a ni a, he ruahmanna palzutte chu thubuai siamsak turin state pollution control body-te pawh hrilh an ni.

Delhi Pollution Control Committee chuan an ṭhenawm state-te thlai ro hal khuk nasa vang leh, festival season thleng vanga air quality a chhiat belh zel avangin November 1 aṭangin ni 10 chhung chu Delhi-NCR-ah in sak hna thawh a khap a ni. He khapna hian khur laih te, civil construction te, stone crusher hman te, bawlhhlawh khu siam thei mix plant hman te pawh a huam a ni.

Boruak bawlhhlawh tihthiang-hlimna tur hian Parliament House bula Gurdwara Rakab Ganj Sahib-ah open-air purifier chu biotech filter nen dah a ni.

Delhi sorkar pawhin a hmaa a kalpui, motor number kawpkim leh kawpkim lo inthlanchhawk tir, odd-even scheme chu a ṭul huna hmang leh turin a inpeih reng tih a sawi bawk.