2019 LS poll-ah mipuiten Modi hi ngaidam suh se: Yashwant Sinha

Union Minister hlui Yashwant Sinha chuan kum 2019 Lok Sabha inthlanpui neih hunah ram mipuite chuan Prime Minister Narendra Modi chu an ngaidam tur a ni lo tiin, a kaihhruai sorkar chu a zung chawpin an paihthla tur a ni, a ti.

Nilaini-a Gujarat-a Junagadh district-a Vanthali-a loneitute hmaa thu a sawiah union minister hlui chuan PM Modi-a kaihhruai sorkar laipui chu kawng tinrengah a hlawhchham niin a sawi. NDA sorkar hnuaiah mitinin harsatna an tawk a, loneitu, ṭhalai, hmeichhia leh Dalit-ten an tuar vek a ni. Sorkar laipui hian engmah tih loin auhla thar chiah a siam. Hemi chinfelna tur chu Lok Sabha inthlanpui neih tura he sorkar paihthlak hi a ni, tiin a sawi.

Kum 2015 inthlanpui neih dawna BJP-in mipuite hnena thil hrang hrang a tiam laia BJP mi leh sa a lo ni ve kha pawi a tiin mipuite lakah ngaihdam dil a duh thu a sawi. Hemi rual hian inthlanpui lo awm turah mipuite chuan Modi chu ngaidam lo tura a duh thu a sawi bawk.

Finance minister hlui hi BJP member a nih lai pawha BJP kaihhruai NDA sorkar sawisel fotu a ni a, kumin April thla khan BJP aṭangin a bang tawh nghe nghe a ni.

Gujarat-a Patidar hnam hruaitu, Hardik Patel chuan Sinha hi loneitute hmaa thu sawi turin a sawm a ni. Sinha chuan PM Modi-an Gujarat-a cheng vaibelchhe tam tak senga Sardar Vallabhhai Patel lim, meter 182 zeta sanga siam a hawn chungchang pawh sawichhuakin, Modi chuan loneitute ṭanpuina tur scheme puang zawk se a duh thu a sawi. "Loneitute a theihnghilh tawh avangin an tana scheme siam engmah puan tur pawh a nei lo a ni", a ti.