Bihar minister hlui manna tur thupek tichhuak

Bihar Social Welfare Minister hlui Manju Verma-i chu Arms Act case kaihhnawihah bail theih loha manna tur thupek tihchhuah a ni. Mahse Verma-i hi Nilaini aṭang khan chin hriat lohin a bibo a ni.

Supreme Court-in minister hlui man a nih loh chungchanga Bihar sorkar a khak hnuah, Nilaini tlai khan Manjhaul sub-divisional court chuan Verma-i manna tur thupek hi a tichhuak a, zawn nghal a ni bawk .

August thla tir lam khan Muzaffarpur shelter home-a hmeichhe naupang enkawlte pawngsual an nih kaihhnawiha Verma-i in an dapnaah, police-te chuan silai mu 50 vel an man a ni. Verma-i hi shelter home-a pawngsualna thlenga mawhphurtu bera puh, Brajesh Thakur leh a pasal Chandrasekhar Verma-te chu inthlunzawmna neia puh an nih avangin August thla khan minister a nihna aṭang hian a bang a ni.