J&K-ah BJP hruaitu kaphlum Curfew puan zui nghal a ni

Jammu and Kashmir-a Kishtwar district-ah Ningani zan khan BJP hruaitu Anil Parihar leh a unaupa kahhlum an ni. He thil thleng vang hian nimin khan curfew puan nghal a ni a, sipaite koh luh an ni bawk.

Official-te chuan BJP state secretary leh a unaupa hi dawr aṭanga an haw lam chu hel nia hriat mi pahnihin an lo kaphlum niin a sawi. Pawikhawihtute hian an lo kir tur hi changin pistol hmagin an lo kaphlum a ni. He tualthahna thleng hi mi tam takin an dem thu an sawi a, buaina lian tham thleng tur venna atan curfew pawh puan nghal a ni bawk.

Kishtwar deputy commissoner Angrez Ringh Rana chuan tualthahna thlen hnu, zan dar 11.00 vel aṭangin sipaite duty tir nghal an ni tih a sawi a, mipuite chu an in aṭanga chhuak lo tura an ngen thu a sawi. Kishwtar chu sensitive area a nih avangin venhimna lam pawh uluk taka kalpui a ngai a ni, a ti.

Kishtwar district-ah hian tualchhung buaina pawh alo thleng fo tawh a, helho chuan tualchhung mite inkara inhuatna thlentir tumin Hindu ho an bitum fo nia sawi a ni.

Parihar-te unau thah a nih chu political party hrang hrangin an dem thu an sawi.

Union home minister Rajnath Singh chuan tualthahna thleng chuan a ṭhawng na hle tih sawiin, police-te chuan pawikhawihtute chu man ngei turin an theihna zawng zawng an hmang dawn a ni, a ti. Parihar-te chhungkua a tawrhpui thu a sawi bawk.