DD cameraman thah chungchangah insawifiah

Communist Party of India (Moaist) chuan nimin khan thuchhuah siamin, Chattisgarh-a Dantewada-a Naxal hel ten police an beihnaa DD cameraman Achutyanand Sadhu thah tel a ni chu an tum reng a ni lo tih sawiin, media mite beih tumna an nei lo tih a sawi.

Thawhlehni khan assembly inthlan neihna tur, Chhattisgarh-a Dantewada district-ah hian Naxal hel te chuan police-te beiin, police pahnih bakah Sahu hi an that a, midang pahnihin hliam an tuar bawk.

He thil thleng chungchangah hian Darbha division committee, CPI (Maoist) Sainath hmingin thuchhuah an siam a, news agency te an pe a ni. An thuchhuahah chuan sipaite chuan nitin inbeihna lem hmangin tualchhung mite chu an beiin kut an thlak a, an tihlum fo a, thubuai lem hmangin an tantir reng bawk tih an sawi. Tualchhung mi ṭhenkhat an mante chu Naxal ho nia chhalin media mite hmaah te an pho a, hei hi an tihdan phung reng a ni, ti. October 30-a thil thleng chungchangah pawh police-te chuan nidanga an tih

ṭhin ang bawkin Naxal ho chu ambush an tum tih a sawi. Police team-ah hian Doordarshan cameraman hi a tel ve tih an hre lo a, journalist te chu thah tumna an nei lo tih an sawi a ni. Hemi rual hian journalist-te chu police zui lo turin, a bik takin election duty-a kalte chu zui lo turin an ngen zui bawk.