VHP-in Ayodhya-ah Ram Mandir lungphum phum tum

Ayodhya-a Ram Temple sak tum chungchang thubuai chu Supreme Court-in kum thara ngaihtuah turin dah mah se, Vishva Hindu Parishad (VHP) hruaitu Sadhvi Prachi chuan Ayodhya-ah hian temple an sa ngei dawn a, December 6-ah a lungphum pawh an phum dawn tih a sawi.

VHP hruaitu chuan, "Ram Temple hi a pumin sak leh ngei a ni dawn. December 6-ah a lungphum kan phum dawn a ni. Hindu-te chu Ayodhya-ah lo kal a, Ram Mandir sak a ni dawn tih puang turin kan sawm a ni. Midang tumah kan mamawh lo", a ti.

Hemi hma hian Rashtriya Swayamsevak Sangh (RSS) general secretary Bhaiyyaji Joshi pawhin a ṭul a nih chuan kum 1992-a an hmalakna ang kha kalpui a ni dawn tih a lo sawi tawh bawk. Kum 1992, December 6 khan Hindu activist-te chuan Ayodhya-a Babri Masjid chuan an lo tichhe tawh a, he mosque awmna hi Ram temple awmna a ni tiin an tihchhiat sak a ni. Hemi hnu hian Ayodhya-a ram inchuh chungchangah buaina a awm zui zel a, ṭum tam tak Supreme Court-ah ngaihtuah ni mah se tun thlengin rel fel a la ni lo.

Ayodhya-ah Lord Ram lim din tum:
Uttar Pradesh Chief Minister Yogi Adityanath chuan Ayodhya-ah Lord Ram-a lim siam tum a nih thu a sawi chu Samajwadi Party hruaitu Azam Khan chuan ṭha a tih thu a sawi.

Azam Khan chuan Rampur-a Sarayu lui bula Lord Ram lim siam tur chu tunhnaia Gujarat-a hawn tak, khawvela milim siam sang ber, meter 182-a sang Sardar Vallabhai Patel-a lim aiin a sang tur a ni, a ti.

CM Adityanath chuan Diwali festival lawmna neih hunah Ayodhya-a Lord Ram lim din a nih tur thu hi official-in a puang dawn a ni. Hindu pawl leh activist hrang hrangte chuan Ayodhya-a Lord Ram lim siam tur hian an lo nawr fo tawh a ni.