Delhi-ah halpuah kg 640 man

Delhi Police-te chuan Supreme Court thupek zawmin North Delhi-a hmun pathum aṭangin halpuah kg 640 chuang an man.

Police-te chuan halpuah hi Sadar Bazar-ah kg 625, Subzi Mandi-ah kg 11.1 leh Buranti police station-ah kg 7.9 an man tih an sawi. Head constable Sandeep Chawla-an Sadar Bazar-a Qutub Road Parking epa dawrah halpuah ṭhahnem tham tak dah a nih thu a dawn avangin an dap zui a, an man ta niin Deputy Commissioner of Police (north) Nupur Prasad chuan a sawi.

Supreme Court-in Diwali puala halpuah leh halmawi hralhna kawnga kaihhruaina a lo siam tawh bawhzuiin, Delhi Police-te chuan nimin khan Delhi khawpui chhung hmun hrang hrangah poster an tar bawk.

October 23 khan Supreme Court chuan Diwali lawmna tura halpuah hralh chhuah theih chin bithliahin, boruak bawlh-hlawh thlen nasa lo chi leh ri bengchheng siam nasa lo chi, green firecrackers chauh zawrhchhuah phal a nih thu a sawi a ni. Online hmang pawha hralchhhuah phal a ni lo tih sawiin, Judge Arjan Kumar Sikri chuan licensed trader te chauhin halpuah him chin nia ngaih hi an hralh phalsak a ni, a ti.

Supreme Court chuan halpuah/halmawi hal theih hun chhung pawh a siam nghal a, Diwali lawmna atan chuan zan dar 8-10 inkarah hal a phalsak a, Krismas leh Kumthar lawmna pual chuan zan dar 11.45 leh 12.45 a.m inkar hal a phalsak a ni.