Khawvela Hospital lian ber tur Patna-ah siam dawn

Bihar cabinet chuan Patna Medical College and Hospital (PMCH) chu khum 5462 awm theihna tura chei ṭhat a, khawvela hospital lian ber tura siam rawtna chu Inrinni khan an pawm. Hospital chei ṭhatna atan hian cheng vaibelchhe 5540.07 ruahman a ni.

Chief Minister Nitish Kumar hoa cabinet meeting neihah he rawtna hi pawm a ni a, hei bakah hian thutlukna dang 34 siam a ni bawk.

Cabinet Secretariat department Principal Secretary Sanjay Kumar chuan hospital siamṭhat hna hi Bihar Medical Services & Infrastructure Corporation Ltd (BMSICL) in a thawk dawn tih a sawi.

PMCH hi kum 1925-a din a ni a, tunah hian khum 1754 a awm mek a ni. MBBS seat pawh 150 aṭangin 250-ah tihpun tum a ni bawk. Hospital hi siamṭhat a nih hunah chuan khum 5462 a awm thei dawn a, super speciality department pariat awm mek chu 36-ah tihpun a ni bawk ang. Tuna khawvela hopsital lian ber chu Belgrade hospital, khum 3500 awmna a nih thu Kumar chuan a sawi bawk.

Kumar chuan hospital siamṭhat hna hi thawh thuma neih tum niin, kum sarih chhunga zawh tum a ni tih a sawi.