Delhi sorkarin loneitute thubuai sut a remti ; Loneituten a thil tiam tihlawhtling turin sorkar laipui nawr

Loneituten farm law duh lohna lantira nawrh an huaihawt laia an laka thubuai a lo ziah luh tawhte chu Delhi sorkar chuan a sut dawn.

Loneitu pawl 40 intelkhawm, Samyukta Kisan Morcha (SKM) chuan Delhi sorkar thitlih chu lawmawm an tih thu sawiin, sorkar laipui pawh loneitute laka a thil tiam, MSP committee din a tiamna telin, tihhlawhtling turin an nawr zui. Sorkar laipuiin loneitute laka a lo tiam tawhte a tihhlawhtling lo a nih chuan, SKM chuan March 14-ah an hma lak dan tur ngaihtuahin Delhi-ah meeting an nei dawn tih an sawi.

SKM core committee member Shiv Kumar Kakka chuan nawrh huaihawt laia loneitute laka thubuai ziahluhte Delhi sorkarin a tihtawp dawn avangin Delhi sorkar leh lieutenant governor Anil Baijal chungah lawmthu a sawi. "Hmalakna ṭha tak a ni a, Delhi sorkar leh L-G hmalakna avangin lawmthu kan sawi a ni. He hmalakna hian sorkar laipui lo intiamna, MSP committee din a nihna tur kawngah pawh beiseina min pe a ni," tiin Kakka chuan a sawi a ni. Sorkar laipui chuan loneitute laka thubuai siamsaktu dang, Madhya Pradesh leh state dang sorkarte pawh thubuaite hi sut vek tura hrilh turin an phut tih a sawi bawk a ni.

Hetih lai hian sorkar laipui chuan loneitute laka a thil tiam, MSP committee din, nawrhhuaihawt laia loneitu thi chhungte zangnadawmna pek leh thil dangte pawh tun thlengin a la tihhlawhtling lo tih Kakka chuan a sawi. State thenkhatah inthlan neih a nih avangin an la ngawi rih a, mahse March 14-ah meeting neiin, sorkar laipui nawrna tur hian hma lak dan tur pawh an ngaihtuah nghal dawn tih a sawi.

Centre-a BJP kaihhruai NDA sorkarin farm law thar pathum a siam duh lohna lantirin, kum 2020 November thla aṭang khan loneitu sang tel chu Delhi border-ah inkulhin lungawi lohna an lantir a ni. Loneitu kalkhawm zinga a tam zawk hi Punjab leh Haryana aṭanga kal an ni. Hun rei tak nawrh an huaihawt hnuah, sorkar laipuiin farm law pathumte a sut leh tak hnuah nikum December thla khan nawrh hi an titawp ta chauh a ni.

Farm law sutna tur bill pawm a nih hnuah, nikum December 9 khan sorkar laipui chuan lonetiute thil phut dangte pawh ngaihtuah a remti a, heng zingah hian MSP committee din pawh a tel. Hemi hnu hian SKM chuan Delhi border-a an nawrh huaihawt chu titawpin, he hmuna loneitu kalkhawmte chuan nikum December 11 khan an in lam panin an inkulhna hi an chhuahsan hlawm a ni.