PM Modi-a'n Russia President Putin a bia ; Ukraine-a India mi hruaichhuah dan sawipui

Prime minister Narendra Modi chuan Nilaini khan Russia president Vladimir Putin chu telephone-a biain, indo thlen mekna Ukraine ram aṭanga India mite him taka hruai chhuah an nih dan tur a sawipui.

Official thuchhuah chuan ram pahnih hruaitute hian Ukraine ram dinhmunte sawiin, a bikin India mi zirlai tam tak awmna Kharkiv khawpui dinhmunte an sawidun niin a tarlang.

Russia President hian India mite hruai chhuah an nihna tura hriat tur pawimawhte pawh hrilh hriat an nih tawh thu leh Russia sipaite chuan buaina hmun aṭanga India mite him taka hruai chhuah a, India rama an haw theihna tura theihtawp an chhuah thu a sawi a ni. Putin chuan Russia lam pawhin humanitarian corridor kaltlangin Kharkiv-a Indian zirlaite chu Russia lam aṭanga hruaihchhuah theih dan tur pawh an ngaihtuah niin a sawi bawk.

Ukraine-ah Indian zirlai man an awm hriat a ni lo : MEA
Ministry of External Affairs chuan Ukraine-a Indian zirlai awm zinga ṭhenkhatte Ukraine mipuite'n hrengin an ram chhuahsan an phal lo tih thuthang awm chu thu dik lo a nih thu a sawi.

"Ukraine-a kan embassy chu India khua leh tuite'n an bepawp reng a ni. Ukraine thuneitute nena kan thawhdunna zarah zirlai tam takte chuan Kharkiv an chhuahsan tawh a, zirlai man chungchang report dawn kan la nei lo a ni," tiin MEA thupuangtu Arindam Bagchi chuan a sawi . "Ukraine thuneitute chu Kharkiv leh khawthlang ram ṭhenawmte kaltlangin kan zirlaite special train hmanga hruaichhuah an nih theihnan an mi ṭanpui kan dil a ni," tiin a sawi zui bawk.

Nilaini thleng khan Kharkiv-ah hian Indian zirlai mi 3,000 chuang chuan awmhmun an la khuar mek a ni. Bagchi chuan Ukraine ram ṭhenawmte'n India mite hruai chhuah an nih theihnan theihtawpa an ṭanpui thu sawiin, "Russia, Romania, Poland, Hungary, Slovakia leh Moldova ramte nen ṭha takin kan thawkho thei a ni. Tunhnai khan Ukraine aṭangin Indian tam tak chu hruaichhuah an ni tawh. Min ṭanpuina avangin Ukraine thuneitute chungah kan lawm a, Ukraine ram ṭhenawm khawthlang ramte Indian an lo dawnsawn danah leh flight-an nghah chhunga an lo mikhual danah kan lawm hle a ni," a ti.

India mi 628 chuanna IAF evacuation flight pathumte chu Romania khawpui Bucharest, Hungary-a Budapest leh Poland-a Rzeszow aṭangin nimin zingkar khan Delhi bula Hindon airbase-ah an thleng a ni. Bucharest aṭangin thlawhtheihna dang, Indian 183 chuanna, Air India Express pawhin nimin zing vek khan Mumbai a lo thleng bawk.