Covid-19 vaccine expire hnai tawhte thlak turin state-te ngen

Union Health Ministry chuan nimin khan state leh UT-te hnenah Covid-19 vaccine, a damdawi thih (expire) hnai tawhte chu private COVID-19 Vaccination Centres (CVCs)-ah expire la hla turte nena thleng dan tur ngaihtuah turin a ti.

Ministry hian state leh UT-te lehkha thawnin, state sorkar chuan sorkar CVC emaw, private CVC-ah emaw Covid-19 vaccine vial tihriral awm lo tura ngaihven ṭha turin a chah bawk. "CoWin kaltlangin vaccine thlakthleng dan tur tarlan a ni," a ti.

Health Ministry-a additional secretary Vikas Sheel chuan private CVC-a COVID-19 vaccine expire hnai tawhte chungchang pawh a hmain sawiho a lo ni tawh tih a tarlang a, "West Bengal, Karnataka, Kerala leh Maharashtra state bik tana zawm tur tihchhuah a ni," a ti. State zawng zawngte chu private CVC-a vaccine an neih dante uluk taka enfiah turin a hrilh bawk a ni.

Covid-19 vaccine pek chhuah a nih aṭangin Nilaini thleng khan ram pumah vaccine dose vaibelchhe 178.02 pek chhuah a ni tawh a, Nilaini bik khan dose 21,83,976 pek chhuah a ni. Kum 18 chunglam zingah vaccine dose khatna la hi mi 90,96,46,017 awmin, dose hniha la tawh hi mi 76,66,01,938 an awm tawh bawk. Kum 15-18 inkar zingah vaccine dose khatna la mi 5,50,25,490 leh dose hnihna la tawh mi 2,87,35,449 an awm tawh bawk a ni. Praecuation dose la hi 2,02,54,328 an awm bawk.