NDRF-in Ukraine tan chhawmdawlna thawn

Sorkar laipuiin Ukraine-a India mi tangkhangte hruai haw hna, Operation Ganga hmanga ngawrh taka a kalpui mek karah, National Disaster Response Force (NDRF) chuan Nilaini khan Ukraine tan chhawmdawlna a thawn.

NDRF chuan indona tuar mek, Ukraine mipuite tan blanket, sleeping mat leh solar study lamp leh hmanraw dangte a thawn a ni.

Chhawmdawlna hmanraw ṭhenkhat hi Nilaini zing lamah Poland pan thlawhtheihnaah thawn a ni a, hemi ni vek tlai lamah Romania pantu, Indian Air Force (IAF) thlawhtheihnaah a dang thawn a ni bawk tih Ministry of Home Affairs chuan a tarlang.

Prime minister Narendra Modi kaihhruai Ukraine chungchanga high-level meeting neihah, Ukraine tana chhawmdawlna leh damdawi lam thawn hi an lo rel tawh a ni.

Sorkar chuan Nilainia chhawmdawlna hmanrua hrang hrang a thawn bakah hian Ukraine border-a harsatna tawk mekte mamawh tur chu thawnchhuah a lo ni tawh tih a sawi bawk.