Kolkata-ah Mehul Choski-a thawhpui man

Punjab National Bank (PNB) a sum tam tak tichingpentu, tlereuh-a sumdawng lian Mehul Choksi-a thawhpui Deepak Kulkarni chu Thawhṭanni khan Kolkata-ah man a ni.

Enforcement Directorate (ED) team chuan Deepak Kulkarni hi Hong Kong aṭanga Kolkata a rawn thleng chu airport-ah Prevention of Money Laundering Act (PMLA) hnuaiah an man a, nimin khan court-ah hruai nghal a ni. ED hian Kulkarni-a laka thubuai ziahluha, Mumbai-a hruai an dil nghal dawn bawk.

Kulkarni hi ram pawn lama Choksi-a sumdawnna te nen inzawmna neia sawi a ni a, ED chuan man tuma zawngin a lakah Look-out Circular (LoC) pawh a lo tichhuak tawh a ni. Choksi-a nena inzawmna nei, Hong Kong-a firm pakhatah director a nih thu official-te chuan an sawi a ni.

PNB-in an bank-a thawk mi ṭhenkhate nena inthurualin Choksi leh a tupa, sumdawng lian Nirav Modi ten cheng vaibelchhe 13,000 zet an tichingpen nia complaint an thehluhhnuah, kumin kumtir aṭang khan Choksi leh Modi chungchang hi chhui zui nghal a ni. Mahse ED leh Central Bureau of Investigation (CBI) ten an laka thubuai an ziahluh hnuah an putu hian ram pawn lamah an bibo nghal a ni.